По Осло, Мадрид, Атина и неколку германски градови и Рим ќе го забранува дизелот до 2024 година. Ова на Facebook го соопшти градоначалничката на Рим, Вирџинија Раџи. “Доколку сакаме да интервенираме сериозно мораме да преземеме построги мерки” напиша на својот Фејсбук профил Раџи. Таа потенцираше дека треба да се следи примерот од Германија каде дизел автомобилите кои испуштаат емисиони гасови над дозволеното се исклучени од сообраќај.

Иако Рим нема некоја голема индустрија сепак важи за еден од најзагадените градови, а најголема причина за тоа се возилата. Градот во денови со зголемена загаденост ги исклучува постарите возила, а ја практикува мерката за пар-непар возење. Сепак ваквите мерки се доста неодржливи поради што мора Полицијата да го регулира и контролира сообраќајот на ваквите возила што предизвика дополнителни трошоци. 

Токму поради тоа, но и следејќи го трендот на забранување на дизелот, Раџи успешно ја пласираше својата одлука за скалесто забранување на дизелот до 2024 година.