Дефинитивно најпривлечен автомобил на штандот на Honda во Женева е концептот EV. Иако овој автомобил дебитираше на минатогодишниот саем во Франкфурт, сепак и во Женева предизвикува воздишки. Модерен, со ретро дизајн, овој електричен автомобил ги има сите предуслови како за автомобил на годината така и за најпродавано возило, барем во конкуренција на постоечките Honda автомобили.

Авто критичарите беа песимистички настроени во поглед на можноста ова возило да влезе во сериско производство. Сепак, на задоволство на фановите на Honda и љубителите на автомобилите, јапонскиот производител објави дека овој модел на пазарите ширум светот ќе се појави во втората половина следната година, но дека ќе може да се нарача уште од почетокот на следната година. Оваа добра вест ја потврди Филип Рос, вториот човек во Honda Motor Europe кој изјави дека благодарение на добро прифатениот концепт, сериската изведба ќе биде официјално претставена во Европа кон крајот на 2019 година, а нарачките Honda ќе почне да ги прима уште на почетокот на 2019 година.

Она што е досега познато е тоа дека EV ќе има пет седишта со повеќе конвенционална кабина и LED светилки. Повеќе технички детали како и детали поврзани со цената се очекува кон крајот на оваа година.