Минатата година на саемот во Женева, Aston Martin ја лансираше својата AMR линија на автомобили која се карактеризира со високи перформанси, повеќе опрема и понапредна технологија. Откако претходно во рамките на оваа линија англискиот производител го презентираше моделот Vantage AMR, деновиве се појавија и првите фотографии од Rapide AMR кој ќе биде вториот автомобил во рамките на оваа линија на лимитирана едиција.

Она што го разликува од основниот модел е тоа што под хаубата овој модел има вграден 6.0 V12 мотор со 591 КС што е за 40 КС повеќе во однос на основната, не AMR верзија. Максималната брзина која може да ја постигне изнесува 337km/h, а во наредните денови се очекува да бидат објавени и резултатите кој овој модел ги постигна на тестирањето во Нирбургринг каде што и во моментов се тестира.

Во однос на цената и точниот датум на отпочнување на продажбата засега кружат само шпекулации, а она што е сигурно е само тоа дека овој автомобил ќе биде произведен само во 210 примероци.